1. januar 2017 slo Høgskolen i Bergen, Høgskulen i Sogn og Fjordane og Høgskolen Stord/Haugesund seg saman og blei til Høgskulen på Vestlandet (HVL). Den nye høgskulen har fem campusar – i Sogndal, Førde, Bergen, Stord og Haugesund. Vi er ein av dei største høgskulane i landet, med om lag 16 000 studentar fordelt på våre fem campusar.

Hos oss kan du ta alt frå årsstudium til å fullføre bachelor-, master- eller doktorgrad. Vi har sterke og innovative fagmiljø innan helse- og sosialfag, ingeniør- og økonomifag, lærarutdanning og samfunnsfag. Kvart år uteksaminerer vi 2700 kandidatar som er med på å løyse viktige samfunnsoppgåver innanfor desse fagområda.

HVL er tett på studentar, region og medarbeidarar. Vår eigenart er eit resultat av dei kunnskaps-, kompetanse- og ferdigheitsbehov det regionale arbeidslivet har. Vår utdannings-, forskings- og utviklingsaktivitet skal difor ha ei særskilt betydning for nyskaping og verdiskaping i regionen. Aktiviteten skal og ha høy nasjonal og internasjonal verdi.

Visjon:
Høgskulen på Vestlandet har ambisjonar om å bli eit universitet med profesjons- og arbeidslivsretta profil, og vi vil vere tett på arbeidslivet, regionen og studentane.

HVL har deling som drivkraft, ideal og metode. Kunnskap veks når den blir delt. Det vi gjer skal støtte opp om vekst for ei berekraftig utvikling av samfunns-, arbeids- og næringslivet og for den enkelte.

Faglege satsingsområde:
HVL - Haugesund har tre fagavdelinger med følgende fagprofil:

• Avdeling for lærarutdanning og kulturfag: Undervising, formidling, forsking og utvikling innan våre ulike lærarutdanningar skal leggje særleg vekt på utvikling av fagleg, kreativ og innovativ kompetanse i skule og barnehage. Analyse av og refleksjon over bruk av teknologi som del av undervising og opplæring er eit viktig fokusområde.

• Avdeling for helsefag: Undervising, formidling, forskning og utvikling innan helsefag skal særleg vektleggje omsorgsvitskap med fokus på folkehelsearbeid, samhandling og personsentrert omsorg til pasientar i langtidsforløp.

• Avdeling for tekniske, økonomiske og maritime fag: Undervising, formidling, forskning og utvikling, og regionalt utviklingsarbeid innan dei tekniske, økonomiske og maritime fagområda skal ha spesiell relevans for den petromaritime næringsklynga i regionen. Vi skal ha særskilt fokus på teknisk sikkerheit, økonomisk og organisatorisk usikkerheitshandtering og komplekse maritime operasjonar.