Vinterlandbrukskolen på Jæren er ein skule med rike tradisjonar. Det overordna målet er at Vinterlandbruksskulen skal gje kunnskap, inspirasjon og framtidstru til landbruksnæringa.

Stiftelsen Vinterlandbruksskulen på Jæren fører vidare eit interkommunalt samarbeid om landbruksopplæring som starta i 1911. 12 kommunar står nå bak skulen, og kommunestyret i kvar kommune oppnemnar kvar sin medlem til styret for skulen. Dei 12 kommunane er Bjerkreim, Eigersund, Gjesdal, Hå, Klepp, Lund, Sandnes, Sirdal, Sola, Sokndal, Stavanger og Time.

Skulen er godkjend etter lov om private skular med rett til statstilskot, og tilbyr for tida agronomutdanning på grunnlag av godkjend læreplan i felles programfag Vg3 landbruk, under utdanningsprogram for naturbruk. Formålet til skulen er å gje ei god tilpassa opplæring til vaksne som ønskjer slik utdanning. Skulen har 60 godkjende elevplassar.

Skulen er lokalisert i leigde lokale i landbruksparken på Særheim i Klepp kommune. På Særheim er skulen i eit aktivt og inspirerande fagmiljø. Skulen har òg eit nært samarbeid med Høgskulen for landbruk og bygdenæringar.

Utdanningstilbod ved skulen:
- Agronomkurs
Agronomkurset fører fram til eksamen i alle faga som du treng for agronomutdanning, og er forankra i godkjend læreplan i felles programfag Vg3 landbruk, under utdanningsprogram for naturbruk. Ved Vinterlandbruksskulen kan du velje å ta dei ulike programfaga kvar for seg eller fleire om gongen, slik at du kan ta agronomkurset over to eller fleire år.