Ulstein vidaregåande skule er ein skule som både utdannar til høgare utdanning på høgskule- og universitetsnivå og til fagarbeidarar innan gitte retningar.

Yrkesutdanning innan elektro og service og samferdsel/IKT fører til fagbrev og fagutdanning, dei treårige utdanningane innan studiespesialisering og idrettsfag, samt påbygging, gjev studiekompetanse og høve til høgare utdanning på høgskule eller universitet. Berre fantasien set grense for i kva retning ein kan gå.

Det firårige TAF-løpet gjev både fagutdanning og studiekompetanse og er skreddarsydd for det maritime miljøet i området.

Skulen har også eit eige tilbod til elevar som treng eit særskilt tilrettelagt tilbod.

Ulstein vidaregåande skule har mellom 500-600 elevar og nærare 100 tilsette. Vi ligg høgt og  fritt til i Høddvollområdet. Skulen var gjennom ei omfattande rehabilitering for 10 år sidan. Også dette skuleåret vil bli prega av byggearbeid. Som nærmaste nabo til Nye Ulsteinhallen vil skuleåret bli noko prega av arbeidet som skal skje der. Vi gler oss til alt er ferdig ein gong utpå hausten 2014. Då får skulen utvida klasseromstalet sitt, og tilhøva for kroppsøving og idrettsfag vert førsteklasses.

Ulstein vidaregåande skule ønskjer å vere den viktigaste arbeidsplassen for alle elevane våre og at skuleåret skal verte vellykka og positivt for alle. Ein føresetnad for det er at alle tek aktivt del i læringsarbeidet, både på eiga hand og i samarbeid med andre elevar og lærarane.